هاد الحرارة🥵 وبعض اخطاااء متتردش ليعا بال تقدر تخرج ليك على تيلفونك 😱 لا قدر الله، تبع معيا:
الحرارة من الأعداء ديال الهواتف, و كتقدر تصفيها لتلفونك فخطرة, أجي تعرف شنو تأثير الحرارة على الهاتف و كيفاش تعامل معاه فهاد الصهد.
💥اش ممكن دير🤔
أولا : الأداء كيثقال بزاف و كيولي التلفون فيه LAG حيث المعالج كيسخن و كيأثر سلبا على الهاتف. و المعالج ملي كيسخن كيبدا هو ينقص من الأداء ديالو تلقائيا باش ما يتحرقش فمرة.
ثانيا : البطارية دغيا كتنقص فالشارج و نفس الوقت العمر الافتراضي ديالها كينقص, و لا قدر الله و سخنات أكثر تقدر تنفاجر.
ثالثا : الشاشات AMOLED كيبدا يبان فيهم الخيال. أسبوع من الاستعمال فهاد الحرارة كافاية باش تخلي الأزرار ديال التنقل لي لتحت و الايقونات لي الفوق يتطبعو فالشاشة و يبقى فيها و هاكدا ها قيمة تلفونك غطيح ف7 أيام.
رابعا : بعض الخصائص ما كتبقاش خدامة و كتوقف على العمل, بحال الكاميرا و بعض الألعاب و التطبيقات الثقيلة. اما الايفون طيفى.
خامس : صحاب الايفون البطارية ديالهم كتنفخ و تقدر تطلع معاها الشاشة و غيضربو ليك ب2.
💢أجي دابا تشوف كيفاش تعامل مع تلفونك فهاد الحرارة :
1- حيد ليه البوشيطة ( خايف عليه يطيح و ما خايفش عليه يسخن و يتحرق ؟😆)
2- ما تخدمش بيه فأوقات الحرارة المفرطة خصوصا ما بين 11 و 4 العشية, و لا كنتي مجبر تخدم بيه ما تلعبش بيه الألعاب الثقيلة.
3- تجنب تشارجيه فوقت الصهد, و لا كنتي مجبر ما تحطوش فوق السداري و لا الناموسية و حيد ليه البوشيطة و حطو فوق شي رخامة و لا الزليج. و شارجيه و هو طافي.
4- طفي جميع الخصائص لي ما كتخدمش بيها بحال NFC. 4G. GPS, البلوتوث الخ ...
5- نقص الضو ديال الشاشة للنص و لا أقل من النص.
6- ما تستعملش الكاميرا و لا كان من الضروري حاول ما تصورش فيديوات 4K او 8K ...
7- سد جميع التطبيقات لي مفتوحة فالخلفية
8- خدم ب Dark Mode عوض المود العادي
9-ما تحطوش فالثلاجة باش يبرد. 🤦🏻♀️
10- قريتي البوسط؟ يالاه حط داك التلفون خليه يبرد و سير ضربها بشي قيلولة 🦥
💢خليلو لي لتحت شنو الحلول لمتبردو بيها هاتفكم📢
هادشي لي كاين و السلام عليكم 🤗
منقول بتصرف للإفادة (عماد الدين حلاجي)
